1975 లో మా శ్రీశైల అహోరాత్ర జపయజ్ఞంలో తొలుదొల్తగా లభించిన ప. ప. శ్రీ బ్రహ్మానందతీర్థ యతీశ్వరుల వారి పరిచయ భాగ్యంతో ఆ ఉద్యమం, ఎంతో మంది పుణ్యపురుషుల కలయికలతో అనేక అనుభవాలు సంతరించుకొంటూ, అనేక సంస్కరణలతో మెరుగులు దిద్దుకొంటూ ముందుకు సాగుతున్నది.

ఇప్పటివారు ప. ప. శ్రీ బ్రహ్మానందతీర్థ యతీశ్వరులవారు ఈ రంగంలో చేసిన పరిశ్రమ ప్రత్యక్షంగా ఎరిగి యుండక పోవచ్చు! కాని అహోరాత్ర, సప్తాహోరాత్ర జపయజ్ఞాల విషయంగా వారు చేసిన తపస్సు మనలను బాగా ప్రభావితం చేసిందని గుర్తించగల్గితే వారు మన ప్రక్కన ఉన్నట్లే!

శ్రీ స్వామివారు క్రోధినామ సంవత్సర ఆషాఢ బహుళ త్రయోదశి మంగళవారము 1904 ఆగష్టు 9 వ తేదీన జన్మించినట్లు తెలియవచ్చింది. వీరు గుంటూరు జిల్లా అమరావతి వాస్తవ్యులు. ఇంటిపేరు మల్లాదివారు. దక్షిణామూర్తిశాస్త్రి శుభనామధేయులు. తండ్రిగారు బ్రహ్మశ్రీ రామకృష్ణ విద్వచ్చయనులు గారు. తనయుడు ప్రముఖ పౌరాణికాగ్రేసరులు బ్రహ్మశ్రీ చంద్రశేఖరశాస్త్రి గారు. శ్రీ స్వామివారు పండితవంశంలో పుట్టిన శాస్త్ర పండితులు! కంచి పరమాచార్యులవారి కడ సన్న్యాసాశ్రమం స్వీకరించి బ్రహ్మానందతీర్థయతి నామంతో ప్రసిద్ధి చెందారు. సద్యోముక్తి క్షేత్రమైన శ్రీకాళహస్తిలో కంచిపీఠం వారి వృద్ధాశ్రమంలో చివరి జీవితం గడిపి, అక్షయనామ సంవత్సర మాఘ శుద్ధ అష్టమి (భీష్మాష్టమి) పర్వదినాన, గురువారము 1987 ఫిబ్రవరి 5 వ తేదీనాడు బ్రహ్మైక్యం చెందారు.

జగద్గురువులు శ్రీ ఆదిశంకరాచార్యులవారు ప్రచారం చేసిన ఉపనిషన్మార్గంలో పయనిస్తూ, శ్రీ బ్రహ్మానందతీర్థ యతీశ్వరులవారు, శాస్త్ర సమ్మతమైనదీ, పండిత ప్రశంసలందుకున్నదీ అయిన ఒక భవ్యమైన కల్పాన్ని సృష్టించి, ఆ కల్పంతో శ్రీ విష్ణుసహస్రనామ స్తోత్రాన్ని ప్రధాన విషయంగా ప్రయోగించి, విజయవాడ శ్రీ కనకదుర్గా క్షేత్రంలో కేంద్రస్థానంగా ఉంటూ, ఆంధ్రప్రదేశ్ రాష్ట్రంలో, అనేక తీర్థక్షేత్రాలలో మఱియు గృహస్థుల ఇండ్లలో - 12 సప్తాహోరాత్ర జపయజ్ఞాలు, 150కి పైగా అహోరాత్ర జపయజ్ఞాలు సమర్థులైన ఉపాసకులతో నిర్వహించి విశేష కీర్తితో వెలుగొందారు. అంతేగాక, శ్రీ శంకర భగవత్పాదాచార్యులవారి శ్రీ విష్ణుసహస్రనామ స్తోత్ర భాష్యానికి ఆంధ్రభాషలో సులభ గ్రాహ్యమైన అర్థవివరణ ఇచ్చారు. ఈ గ్రంథానికి అనేక విషయాలను చేర్చి, దాతలను సమకూర్చి, మూడు పర్యాయములు ముద్రణ చేయించి - నిత్యపారాయణ ప్రతిజ్ఞాపత్రము సమర్పించినవారికి ప్రతులను ఉచితంగా పంపిణీ చేయించారు. ఈ మూడు మారులూ ముద్రించిన గ్రంథాలకు శ్రీ స్వామివారు వ్రాసిన ఉపోద్ఘాతములు ఎంతో జ్ఞానదాయకమైనవి. వార్ధక్యభారాన్ని మోస్తూ అశక్తులై, తమ ప్రచారాన్ని విరమించుకొని, అప్పటి మా ఉద్యమానికి సుమారు 12 సంవత్సరాల కాలం అండగా నిలిచారు.

… జగర్లపూడి లక్ష్మీ నారాయణ