శ్రీ జగర్లపూడి లక్ష్మీనారయణ గారు (గురువు గారు) ధాత నామ సంవత్సర పుష్య శుక్ల దశమి అనగా 1937 జనవరి 22న వారి తల్లిదండ్రులు బ్రహ్మశ్రీ జగర్లపూడి కేదార శాస్త్రి గారు, అన్నపూర్ణమ్మ గార్లకు మొదటి సంతానంగా గుంటూరు జిల్లా, సత్తెనపల్లి తాలూకా, గోరంట్ల అగ్రహారంలో జన్మించినారు. వీర్కి ముగ్గురు సోదరులు. వీరి తండ్రి గారు బ్రహ్మశ్రీ జగర్లపూడి కేదార శాస్త్రి గారు 1946లో జీవనోపాదికై జగ్గయ్యపేటకు వచ్చి స్ఠిరపడ్డారు. వీరి విద్యాభ్యాసమంతా జగ్గయాపేటలోనే జరిగినది. వీరు విజయవాణి గారిని వివాహం చేసుకున్నారు. వీరి కుమార్తెలు ప్రసన్న లక్ష్మి గారు, ఇందిర గార్లు.

వీరికి సాహిత్యాభిరుచి, సంగీత శ్రవణాభిరుచులు ఉండడంవల్ల ఆ రంగాలలో కృషి చేశారు. సాహిత్యంపైన ఉన్న పట్టుతో వీరు పారాత్పర శతకాన్ని రచించినారు. వీరి మనవలు ఆ సతకాన్ని ఈటీవలే ముద్రణ చేయించారు. శ్రీ త్యగరాజస్వామి వారి కీర్తనలంటే బహు ప్రీతి.

వీరు 1957లో నాగార్జున సాగర్ ఎడమ గట్టులో గల స్టోర్స్ డివిజన్ ఆఫీసులో స్టోర్ అసిస్టెంటుగా పని చేశారు. 1960లో హైదరాబాదుకు చేరారు. 1963 నుండి 1995 వరకు ఆంధ్రభూమి దినపత్రికలో పని చేసి పదవీవిరమణ చేశారు.

క్రమంగా ఆస్తిక మహాశయుల, భక్తవదాన్యుల సహకారంతో, శ్రీ బ్రహ్మానంద తీర్థ యతీశ్వరుల వారి ఆశీర్వచన బలంతో, శ్రీ కృష్ణస్వామి దివ్యానుగ్రహంతో 'శ్రీ విష్ణు సహస్ర నామ క్షేత్రం' ఆవిర్భవించింది. ఈ మహావిర్భావంలో నలుగురితో పాటు నేను గూడా యథాశక్తి పాటుపడటం జరిగింది.

ఈ క్షేత్రం ఆవిర్భవించిన తర్వాత - దీనిలో నిత్య ద్వాదశావృత్తి పారాయణము, బహుళ ఏకాదశులలో అహోరాత్ర జపయజ్ఞాలు, ప్రతి మాఘ శుద్ధ మాసంలో సప్తాహోరాత్ర జపయజ్ఞము, ప్రతి ఆరు నెలలకు ఒకమారు ఈ పుణ్య భారతావనిలోని తీర్థ క్షేత్రాలలో జపయజ్ఞములు జరుగుతూ వస్తున్నవి. ఇలా 'శ్రీ విష్ణు సహస్రనామ క్షేత్రం' శ్రీ విష్ణు సహస్రనామ స్తోత్ర జప యజ్ఞాలతో మూడు పూవులు ఆరు కాయలుగా, నిత్య పల్లవంగా అలరారుతూ ఉన్నది!

అనూహ్యమైన ఇంతటి మహాఘనకార్యం శ్రీ బ్రహ్మానంద తీర్థ యతీశ్వరుల వారి ఆశీస్సులతో, ఎందరో పుణ్య పురుషుల త్యాగం వల్ల, తపఃఫలం వల్ల, సభ్యుల పారాయణం వల్ల, శ్రీ కృష్ణ పరమాత్మ యొక్క అపార కృపావిశేషం వల్లనే కొనసాగుతున్నది.